Noong nag-aaral pa `ko tandang-tanda ko pa
Ang magsalita ng Tagalog ay pinagmumulta
Ito'y `pinagbawal, ako'y nagtataka
Pag nag-ingles naman ako, sila'y natatawa.

Ang paaralan ngayon ay aking napapansin
Itong edukasyo'y pangatlo lang sa layunin
Ang una ay pera, pangalawa ay pera rin
Mga walang pera'y hindi nila pinapansin

[Koro]
Ang sistema ng edukasyon, kailan magbabago?
Kailan ka lalaya sa kolonyal na isip mo?
Kailan ka aasenso? Kailan matututo?
Bumabagal ang pag-unlad sa maling sistema mo.

Mga anak mayamang pinag-enrol sa eskwela
Hindi pumapasok bulakbulero lang pala
At ang mga anak nitong mahihirap
Ay gustong mag-aral ngunit walang ibabayad

[Koro2]
Ang sistema ng edukasyon kailan magbabago?
Kailan ka lalaya sa kolonyal na isip mo?
Kailan ka aasenso? Kailan matututo?
Bumabagal ang pag-unlad sa maling sistema mo.

[adlib]

Itong mga magulang ko'y nahihirapan na
Marami nang utang dahil sa `king matrikula
Nagpapakasakit, nagpapakahirap
Tinitiis lahat mapagtapos lang ang anak

[ulitin ang koro, mabagal, madiin]

--- Heber Bartolome